Þessi vefsíða notar fótspor (e. cookies) til að auðvelda þér að vafra um vefinn, geyma upplýsingar um stillingar o.fl. Með því að nota vefinn samþykkir þú stefnu okkar um notkun fótspora. ×
Laser / Botox / Fylliefni

Meðferð á hrukkum með vöðvaslakandi efni

Meðferð á hrukkum með vöðvaslakandi efni hefur verið notað í áratugi. Í dag er meðferðin hins vegar algengasta fegrunarmeðferðin og voru t.d 7,2 milljónir meðferða framkvæmdar í Bandaríkjunum árið 2017.

Meðferðarsvæði
Algeng meðferðarsvæði eru t.d. reiðihrukkurnar á milli augna, broshrukkur í kringum augun og láréttu línurnar á enninu. Vöðvaslakandi efni er sprautað í vöðva eða húð og kemur í veg fyrir taugaboðin sem valda vöðvasamdrætti á meðferðarsvæði. Línur og hrukkur sem hafa myndast vegna andlitshreyfinga í gegnum árin, t.d. við bros eða við það að setja í brýrnar á móti sólinni, mýkjast og verða minna sýnilegar.
Vöðvaslakandi efni er einnig mikið notað í læknisfræðilegum tilgangi eins og t.d. gegn óhóflegri svitamyndun í holhöndum.
Einungis læknar með viðeigandi réttindi og sérfræðikunnáttu mega gefa vöðvaslakandi efni.

Til að fá frískara og úthvíldara útlit eru fylliefni oft notuð samhliða vöðvaslakandi efnis. Fylliefnin geta gefið húðinni unglegra yfirbragð, bætt upp vef sem tapast hefur með árunum á t.d. yfir kinnbeinum og svæðinu milli nefs og munnviks auk þess sem þau geta fyllt upp í djúpar hrukkur og gefið fyllri varir.

Einungis læknar með viðeigandi réttindi og sérfræðikunnáttu í þessari meðferð mega gefa vöðvaslakandi efni.


Fyrir og eftir mynd eftir vöðvaslakandi efni í krákufætur
Fyrir og eftir mynd eftir vöðvaslakandi efni í enni


Fyrir og eftir mynd eftir vöðvaslakandi efni í enni


Hverjir eru kostir og ókostir meðferðarinnar?
Helstu kostir við vöðvaslakandi efni eru að meðferðin er örugg, sársauki er lítill og batatími stuttur. Fínar línur og hrukkur minnka til muna og yfirbragð húðarinnar verður unglegra og ferskara.

Helstu ókostir við vöðvaslakandi efni eru að árangurinn er tímabundinn. Meðferð þarf að endurtaka á 3–6 mánaða fresti til þess að viðhalda því yfirbragði sem óskað er eftir. Því er algengt að koma 1–2 sinnum á ári í meðferð. Auk þess getur komið mar á stungusvæði, einkum ef svæðið er viðkvæmt, sem jafnar sig þó á um viku.

Hvernig fer meðferðin fram?
Í fyrsta viðtali eru óskir hvers og eins ræddar og farið yfir meðferðarmöguleika til að fá fram því sem óskað er eftir. Fyrsta viðtal er ávallt undanfari meðferðar. Einnig er farið í gegnum heilsufarssögu og undirbúning fyrir meðferð.

Litlu magni af vöðvaslakandi efni er sprautað með fínni nál á nokkra stungustaði á því svæði sem á að meðhöndla og tekur meðferðin um 10–20 mínútur. Hægt er að óska eftir staðdeyfingu með deyfikremi ef ástæða er til. Þá þarf að mæta einni klukkustund fyrir meðferðartímann.

Hvað gerist eftir meðferðina?
Meðferðin er oftast ummerkjalaus og flestir geta snúið beint til vinnu eða skóla. Hvíld er ekki nauðsynleg eftir meðferð en mælt er með því að takmarka líkamlegt álag fyrsta sólarhringinn og t.d. sleppa líkamsrækt. Ef tilhneiging til myndunar marbletta er til staðar gæti komið fram mar á stungusvæðinu. Mælt er með því að nota andlitsvöðvana á meðferðarsvæðinu eins mikið og hægt er eftir meðferð, því það eykur áhrif hennar. Þó ber að varast að þrýsta á stungusvæðið eða nudda það, því það gæti valdið því að efnið fari út í nærliggjandi vöðva sem ekki átti að meðhöndla.

Árangur meðferðarinnar sést ekki strax. Efnið byrjar að virka eftir nokkra daga en getur tekið allt að tvær vikur að ná fullri verkun. Þess vegna eru bókaðir endurkomutímar um það bil tveimur vikum eftir meðferð þar sem árangurinn er metinn. Endurkomutímar eru sjúklingum að kostnaðarlausu.

Samsett meðferð með vöðvaslakandi efni og fylliefnum
Til að fá frískara og úthvíldara útlit notum við oft fylliefni samhliða vöðvaslakandi efni. Fylliefnin eru yfirleitt notuð til að yngja upp húðina, bæta upp vef sem tapast hefur með árunum t.d. eins og kinnar og svæðið á milli nefs og munnviks, til að fylla upp í djúpar hrukkur og stækka varir. Sjá nánar með því að smella á flipann "fylliefni" hér á síðunni.


Ef ég hef áhuga á þessari meðferð hvað geri ég?
Þú pantar þér tíma hjá húðlækni í síma 520-4444 eða með tölvupósti á netfangið timabokun@hls.is þar sem farið er yfir þínar óskir og hvaða meðferðir henta best. Þá er farið í gegnum kosti og galla viðkomandi meðferð og mögulega fylgikvilla. Eftir fyrsta viðtal er bókað í meðferðartímann.
Í fyrsta viðtali er einnig farið í gegnum heilsufarssögu þína. Ef þú ert að taka inn blóðþynnandi lyf þarf yfirleitt að taka hlé í nokkra daga fyrir meðhöndlunina og einnig er ráðlegt að taka ekki inn lýsi eða Omega töflur viku fyrir meðferð.

Ef þú ert ólétt eða með barn á brjósti þá er meðferð með vöðvaslakandi efni ekki ráðleg.

  • Húðlæknastöðin

    Smáratorg 1,
    201 Kópavogur,
    Iceland

  • Opnunartími

    Alla virka daga
    8:00 - 16:00

    Skiptiborð er opið
    09:00 - 12:00
    13:00 - 15:30

  • Hafa samband

    Sími: 520 4444
    Fax: 520 4400
    Email: timabokun@hls.is
    Laser / Meðferð á hrukkum / Fylliefni
    Sími: 520 4407 & 520 4412
    Fax: 520 4400
    Email: laser@hls.is

  • Samfélagsmiðlar

© Húðlæknastöðin ehf. - Með notkun á vefnum samþykkir notandi notkunarskilmála hans - Notkunarskilmálar og yfirlýsing um persónuvernd